虎膽龍威 擇日開戰 (A Good Day to Die Hard)

過年睇舊片，竟然有意無意看了這部2013年的賀歲大片。John McClane (Bruce Willis飾) 今次闖莫斯科，還有拉埋阿仔 Jack McClane (Jai Courtney飾) 落水，大概意味老爹保刀未老，一集接一集，至少可與湯少的「任務不可能」較量切磋。

齊飛車、齊槍戰、齊逃亡、齊救國，我只在乎兩人能否擦出火花，鬼理你是否父與子！

這位紐約喪警造型與想像中的間諜離天萬丈，今次要離境執法，就不得不花篇幅去描寫他那個突然變歪的仔仔，不過，荷里活式的間諜電影與警匪電影大概都已行到山窮水盡，如果沒新念頭，賴尿牛丸並非一叫即到。

單看公式，《擇日開戰》做足起承轉合，有場面，有動作，有親情，就算少了性感床上戲，大概全球總有一千幾百萬觀眾會買票入場，只是我等吃慣荷里活奶水大的，就想導演 John Moore 不只一味公式翻拍，而是膽搏膽式加入新元素、新角色、新挑戰，老老實實，我又點會有興趣去品味 John McClane 的父子情懷呢？除非佢個仔真係成為世界級殺人狂魔，那我就一定會追看那種意想不到的情節了。

現在連俄羅斯人都不過是貪少便宜的壞份子，你真的要派你國家級的破壞王 McClane 去炸毀大街小巷嗎？這種大美國口味沿用半世紀，也成為了懶惰編劇隨手執來的必殺技倆。當然，我已經不敢再提《虎膽龍威》第一集的精密心思，但 30 年往矣，真要如此倒退才能開拓新市場嗎？

我賴全球化，但全球化明明令我們行先30年，為何如今卻要退後到大家 synchronize呢？

伸延：
．《虎膽龍威 4.0》
．《鬼影約章》、《職業特工隊 III》
．《未來戰士2018》